នាយក CIA អាមេរិក បានទៅជួបមេដឹកនាំស្តីទីវ៉េណេស៊ុយអេឡា នៅទីក្រុងការ៉ាកាស
(វ៉ាស៉ីនតោន)៖ នាថ្ងៃសុក្រ ទី១៦ ខែមករា មន្រ្តីរដ្ឋបាលប្រធានាធិបតី ដូណាល់ ត្រាំ បានឱ្យដឹងថា នាយកទីភ្នាក់ងារចារកម្មអាមេរិក លោក John Ratcliffe បានធ្វើដំណើរទៅប្រទេសវ៉េណេស៊ុយអេឡា ហើយបានជួបមេដឹកនាំស្តីទី លោកស្រី Delcy Rodriguez ក្នុងទស្សនកិច្ចកម្រិតខ្ពស់លើកដំបូងធ្វើឡើងដោយទីក្រុងវ៉ាស៉ីនតោន ចាប់តាំងពីយោធាអាមេរិក បានចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
លោក ត្រាំ បានបញ្ជូនប្រមុខ CIA ទៅកាន់ទីក្រុងការ៉ាកាស កាលពីថ្ងៃព្រហស្បតិ៍សប្តាហ៍នេះ ដើម្បីបើកកិច្ចពិភាក្សាជាមួយលោកស្រី Rodriguez ដែលបានប្រព្រឹត្តទៅរយៈពេល២ម៉ោង ហើយវាកើតមានឡើងតិចជាង២សប្តាហ៍ បន្ទាប់ពីលោក Maduro និងភរិយា ត្រូវបានចាប់ខ្លួនក្នុងប្រតិបត្តិការយោធារបស់អាមេរិក។
ប្រភពពីមន្រ្តីរដ្ឋបាលលោក ត្រាំ បានឱ្យដឹងទៀតថា ក្រោមការបង្គាប់របស់លោកប្រធានាធិបតីអាមេរិក លោក Ratcliffe បានធ្វើដំណើរទៅជួបប្រធានាធិបតីស្តីទីវ៉េណេស៊ុយអេឡា ដើម្បីពាំនាំនូវសារប្រាប់ថា សហរដ្ឋអាមេរិកទន្ទឹងរង់ការធ្វើឱ្យប្រសើរឡើងទំនាក់ទំនងការងារ ជាមួយប្រទេសអាមេរិកឡាទីនមួយនេះ។ មន្រ្តីដដែលបានបន្ថែមថា លោក Ratcliffe និងលោកស្រី Rodriguez បានជជែកអំពីលទ្ធភាពនៃឱកាសសម្រាប់កិច្ចសហប្រតិបត្តិការសេដ្ឋកិច្ច ខណៈវ៉េណេស៊ុយអេឡា លែងជាកន្លែងជ្រកកោនសុវត្ថិភាព សម្រាប់សត្រូវរបស់អាមេរិកទៀតហើយ ជាពិសេសពួករត់ពន្ធគ្រឿងញៀន។
ទស្សនកិច្ចខាងលើធ្វើឡើង មួយថ្ងៃបន្ទាប់ពីលោក ត្រាំ បានសន្ទនាជាមួយលោកស្រី Rodriguez ជាលើកដំបូងតាមទូរសព្ទ និងក្នុងថ្ងៃតែមួយដែលរូបលោកបានជួប មេដឹកនាំបក្សប្រឆាំងវ៉េណេស៊ុយអេឡា លោកស្រី Maria Corina Machado នៅសេតវិមាន។
គួរបញ្ជាក់ថា មកទល់ពេលនេះ លោក ត្រាំ បានផ្តល់ការគាំទ្រឱ្យលោកស្រី Delcy Rodriguez ដែលជាអនុប្រធានាធិបតី និងជាសម្ព័ន្ធមិត្តសំខាន់ម្នាក់របស់លោក Maduro ឱ្យនៅបន្តគ្រប់គ្រងប្រទេស ដរាបណាទីក្រុងវ៉ាស៉ីនតោន និងទីក្រុងការ៉ាកាស និយាយត្រូវគ្នារឿងប្រេងវ៉េណេស៊ុយអេឡា៕
About news friends
DDD
0 comments:
Post a Comment